Wednesday, August 30, 2006

بلدي طنطا واحب اعيش اونطا

طريق مصر اسكندرية الزراعي يمر بمدينة طنطا
اي مستخدم لهذا الطريق عندما يصل الى مدينة طنطا يشط انه عن طريق الخطأ تجاوز الطريق الزراعي ودخل الى احد الطرق الداخلية في المدينة

ذلك لان الطريق تم بناء جانبيه وذلك منذ زمن بعيد حتى اصبح بالفعل طريقا داخليا في المدينة
حتى ان السرعة المحددة عليه لا تتجاوز 60 كم في الساعة

هل هذا يعقل 60 كم في الساعة على طريق يربط بين المحافظات

واخيرا تم انشاء طريق بديل ياخد المار من اول مدينة طنطا مباشرة الى مدينة كفر الزيات وبذلك يعد الطريق بمثابة طريق دائري لمدينة طنطا

ولكن
تم تحديد كارتة للمرور على الطريق
وكأنك يا ايو زيد ما غازيت

طب ليه الكارته على الطريق ده
طب الطرق الصحراوية ماشي مافيش محافظة تهتم بالطريق وصيانته
طب ده طريق داخلى تابع لمحافظة الغربية

ماهو حاجة من اتنين يا اما المرسيدس غليت والمحافظ مش عارف يجدد عربيته
يا اما مش لاقي فلوس يصرف على فريق الكورة اللي صعد اخيرا للدوري الممتاز

تحديث 14 سبتمبر
اللوحة اللى مكتوب عليها اسعار الكارته اتشالت
وعلى فكرة الطريق الجديد بيوفر 5 كيلو فقط، مش مهم المهم متدخولش في الزحمة

Monday, August 21, 2006

القطــــــ س ح م ــــــــار

كارثة جديدة قديمة من كوارث القطارات
لن اتكلم عن الاهمال
لن اتكلم عن التسيب
لن اتكلم تاريخ القطارات في مصر
فقط سأتكلم عن الضحايا

فئة من الشعب المصري كادحة بالفعل
تسافر يوميا من بلادها الى القاهرة حيث قدر الله لها ان تنزل ارزاقها
يغدون صباحا ويروحون مساءا بارزاقهم التي قدرها الله لهم

هؤلاء الفئة ليسوا من نسج الخيال ولا من صنع اوراق الجرائد ولا كلمات نجيب محفوظ
لأنهم لم يظهروا في ايها

بعد حادث قليوب الاليم
احمد الله كثيرا ان هذا الحادث لم يكن اثناء العام الدراسي
فلو كان ,لصار عدد الضحايا خمسة اضعاف هذا العدد على اقل تقدير

انا اعرف هذا القطار جيدا
القطار القادم من دمياط باتجاه القاهرة
يخرج من محطة طنطا 6:40
كان هذا بين عامي 1996 و 2001
هذه هي الفترة التي كنت استعمل فيها هذا القطار
كنت اسافر فيه يوميا اثناء دراستي في كلية الهندسة جامعة الازهر
علمت بعد ذلك ان المعاد ربما قدم 10 او 5 دقائق

من فضل الله علي انه لم يصب لي قريب او صديق في هذا الحادث
ولكني حزين على القطار نفسه فهو عشرة عمر بالنسبة لي

وحزني يزداد وازداد الما عندما اسمع عن التعويضات
السيد الفاضل رئيس حكومتنا زاد اسعار الوقود فهي تستحق الزيادة اما المواطنين فاسعارهم في النازل

ويا ترى رجال الاعمال اللى اتبرعوا بالملايين لمكافئة لعيبة الكورة هيساعدوا الناس دي
ويا ترى الفنانين اللى بيتعالجوا من فلوسنا حايساعدوا بحاجة
ولعيبة الكورة اللى على قلبهم قد كده حاسوا اصلا بالناس دي ولا لأ
واحمد شوبير نائب طنطا اللى سايب الطنطاويه للفشل الكلوي وبيدور على حقوق الكورة

انا لله وانا اليه راجعون

الازهر الشريف

بني الازهر الشريف بأمر من المعز لدين الله الخليفة الفاطمي في مصر ليكون مسجدا جامعا وجامعة لتدريس العلم الديني واللغوي
وكان العلماء ينتهجون المذهب الشيعي تبعا لسطان الفاطميين
حتى استولى صلاح الدين الايوبي على حكم مصر فأمر بإغلاق الازهر الشريف حيث ان صلاح الدين سني لا يقبل بافكار الشيعة
حتى جاء عصر المماليك وبعد انتهاء الحرب على التتار واستولى الظاهر بيبرس على حكم مصر فاعاد فتح الازهر الشريف ليكون جامعاً وجامعةً ولكن هذه المرة لتدريس المذهب السني

وظل الازهر الشريف لفترات طويله منارة العلم الديني التي تنبع من قاهرة المعز لترسل بنور العلم لربوع الارض ومشارقها ومغاربها

ولم يقتصر دور الازهر على العلم فقط بل كان للازهر دور هام في الحركات السياسية على مر العصور وكلنا يعلم دور الازهر ايام الاحتلال الفرنسي والاحتلال الانجليزي وكيف كان شوكة في ظهور كل منهم

ثم جاءت ثورة يوليو وجاء معها المد الاشتراكي الروسي الشيوعي
وكانت الحرب الداخلية على مراكز القوى ومنها الازهر

عانى الازهر والازهرية من ويلات هذه الحرب ومازال يعاني حتى يومنا هذا

من يتابع السينما المصرية يلاحظ الاختلاف الكبير في تمثيل صورة الشيخ الازهري في افلام قبل وبعد الثورة

ظهرت صورة الشيخ الاراجوز والذي يتبناها حتى الان فنان مصر الاول عادل امام

ظهرت العديد من النكات والافشات التي تسخر من الازهر والازهرية

ثم كانت الضربة القاسمة التي بالفعل ارى انها السبب الرئيسي في بعد الازهر عن مكانته القديمة وهي اضافة الكليات العلمية للازهر

اضيفت الكليات العلمية للازهر بحجة التطوير ومجاراة العصر وبهدف تخريج الطبيب والمهندس المسلمين الذين يرفعان راية الاسلام عالية بعلمهما وعملهما معا

وكان هذا هو السم الذي وضع في العسل
نعم الهدف غالي ونبيل ومطلوب
لكن ما هو الثمن

الثمن ان الكليات العلمية جذبت الطلبة المتفوقيين ولم يتبقى للكليات الازهرية الاصليه
الا الطلاب الضعاف اصحاب المجاميع الضعيفة في الثانوية الازهرية

اصبح طالب كلية اللغة العربية حاصل على 50% في مادة اللغة العربية في الثانوية الازهرية
وبالتالى لن تجد خريجا من كلية اللغة العربية مثل الشيخ محمد متولي الشعراوي

قس على ذلك كليات مثل اصول الدين وكلية الشريعة الاسلامية الخ

والنتيجة
ضعف خطباء المساجد
فتح الساحة على مصراعيها لانصاف المتعلمين للحديث في الدين
ضعف الوعي الديني
استعمال الارهابيين للدين كوسيلة لجذب الشباب

اليس الثمن باهظا

Monday, August 07, 2006

ليه الكلام كتر قوي اليومين دول على الشيعة والخلاف بين السنة والشيعة
عشان حزب الله شيعي
والخلافات البسيطة بقت مصايب لازم تتحل دلوقتي
والخلافات الكبيرة بقت سبب للتكفير بل بقت ذريعة للتعاون مع اسرائيل ضد حزب الله
هو فيه ايه
هو احنا عبط للدرجادي
ليه دايما عندنا مشكلة في الاولويات من أول الراجل البسيط اللي ماشي في الشارع لحد رؤساء الدول وفطاحلة السياسة
مرورا بالمثقفين ورجال الدين

تلاقي الراجل مش لاقي ياكل وكل همة علبة السجاير وايجار وصلة الدش
وخطباء المساجد سابوا الزنا والربا والمفاسد اللتي منخوره في مجتمعنا وماسكين في السنن لحد ما خلوا اللي مابيفهموش يتريقوا عليهم
والمثقفين وصل بيهم تقليد الغرب انهم بقوا بيترقوا علينا ماهو ده برضوا من ضمن التقليد
ودلوقت تلاقي السياسيين بيفكروا في المد الايراني المحتمل في المنطقة وناسيين الدودة الصهيونية اللى عمالة تقرقض في عضامنا

ماهو حاجه من اتنين
يا اما دول جواسيس صهاينه بيحاولوا يشتتونا ويبعدوا تفكيرنا عنهم وعن اللى بيعملوه لحد ما يخلصوا
يا اما احنا عشان ما بعرفش بندور على العدو الاضعف او اللى ما لوش ضهر ونخبط فيه