التحدي الحياه

اسبوعين مروا على التدوينه اللي فاتت
ما فتحتش المدونه ولا بصيت عليها الا في السريع
بصراحه كنت مطحون في الز طحنه بالنسبالي

احلى حاجه بالنسبه لاي مبرمج انه يقابل تحدي حقيقي ينطحن فيه وفي الاخر يحل المشكله بالسهل الممتنع
دي من اسعد لحظات حياتي

الموضوع ده فكرني بقصه بصراحه ما عرفش ايه مصدرها ولا ان كانت حقيقيه ولا لأ بس اعتقد ان معناها صحيح ومفيد

القصه بتحكي حكاية اليابانيين مع صيد السمك
في البدايه كان الصيد من على الشاطئ بطرق الهواه المعروفه ولما زاد الطلب على السمك صنعوا قوارب يدخلو بيها لاعماق مش بعيده عشان يصتادوا سمك اكتر ويرجعوا في نفس اليوم

ولما الطلب زاد اكتر واكتر عملوا مراكب اكبر ودخلوا لاعماق اكبر ورحله الصيد زادت مدتها بقت ايام
ولكن ظهرت مشكله ان السمك بيوصل ميت فاتجهوا لعمل احواض في المراكب عشان يعيش فيها السمك طول رحلة الصيد

لكن اكتشفوا ان الزباين بتشتكي ان طعم السمك متغير
وبدراسة المشكله لقوا السبب ان السمك مابيتحركش كتيير في الاحواض طبعا المساحه مش كبيره والاكل بيوصل بسهوله وقلة حركة السمك بتأثر على طعمه

فقرروا يحطوا في كل حوض سمكة قرش صغيره ماتقدرش تاكل السمك الكبير وفي نفس الوقت توفر تحدي او حافز يخلي السمك بيتحرك طول الوقت

خلاصة القصه ان التحدي هو اللي بيدي الحياة طعم

واحنا كمسلمين قدامنا تحدي ابدي مع الشيطان
وكمان تحدي في الامر بالمعروف والنهي عن المنكر
وتحدي في اعمار الارض
اظن ان المسلمين حياتهم الز حياه