عمار يا مصر

شوفتوا الكادر الجديد بتاع المعلمين كانت نتيجته ايه

ابتكار في مجال الدعايه والاعلان
هو الكادر ده معمول عشان يقلل الدروس ولا يزودها
عموما افرح يا أ/ شريف اعلانك وصل البي بي سي
http://news.bbc.co.uk/hi/arabic/middle_east_news/newsid_7014000/7014733.stm

ثقافة

من فترة قرات تدوينه عن الشحاته

وازاي في مصر شحاتين على جميع المستويات وممكن تعتبرهم درجات زي بكالوريوس وماجيستير ودكتوراه حاجه كده

للاسف مش فاكر المدونه اسمها ايه بس فعلا كانت تدوينه جميله

المهم و من غير ما اطول عليكم

انا شفت نوع من الشحاته لم يذكر في تلك التدوينه وبصراحه مش عيب في التدوينه ولكن لان النوع ده جديد

(على الاقل بالنسبه لي)

الشحات قاعد على الارض

(عادي)

في نهاية سلم عبور المشاه

(عادي)

عمال بيدعي

(عادي برضه ؟)

لأ مش عادي لأنه كان بيدعي على الناس

انا طبعا مش فاكر نص الدعوات ولكن حاجه زي

ربنا يوريكوا الويل اللى انا شايفه

ربنا يشلكوا زي ما انا مشلول

يا ولاد ستين في سبعين

حاجه من النوع ده

طبعا انا "ازبهليت"

طبعا انا عندي خلفية مسبقة ان اي واحد بيشحت على الاقل في شوارع المحروسه يستاحل شلاليط عساكر البلديه

وانطلاقا من هذه الخلفية كنت على وشك انني

مش مهم

المهم ان انا لحقت نفسي

بعد ما تذكرت مقولة اعط السائل ولو على فرس

"بصراحه خفت لتكون حديث"

المهم تجاهلته تماما وكملت طريقي بس الافكار ما سبتنيش

يا ترى دا فعلا اسلوب بيجيب نتيجه في الشحاته؟

طب هو جاب الفكرة دي منين؟وازاي تخيل انها تنجح؟

ممكن تكون وزارة الداخلية بتدي كورسات في الشحاته؟

"امال جاب البلطجه دي منين"

ولا دي خلاص بقت ثقافة المجتمع؟

"اتقي شري احسن لك"