عصبية ولا اقتناع

لما بتتفرج على متش كورة بتشجع الاهلى او الزمالك رغم انك عارف ان لعبه وحش
وبتشتم الحكم لو حسب ضربة جزاء على فريقك رغم انك عارف انها صحيحة
دي اسمها عصبية او حمية الجاهلية

وانا في احدى مراحل الدراسة كنا بندرس حديث رسول الله
بني الاسلام على خمس شهادة ان لا اله الا الله ....... الخ

قال لنا المدرس انه يجب على كل مسلم ان ينطق بالشهادتين مرة واحدة في العمر بنية الدخول في الاسلام

من هنا انا بسأل كل واحد انت مسلم عصبية ولا اقتناع
انت بتقول لا اله الا الله وانت حاسس معناها ولا عشان اتعودت انك لما تشوف حاجة تشير للموت تقولها
لما واحد يبلتج عليك ومتعرفش تاخد منه حق ولا باطل بتقول حسبي الله ونعم الوكيل وانت بتقصد معناها ولا زي ما تكون بتشتم وتجرى

انا مش بقول كده عشان افتكرت استاذي ولا عشان نظرية الكورة لا
انا كمان شفت مسيحيين بيقولوا صلي على النبي
ومسيحيين بيقولوا لا حول ولا قوة الا بالله
ومسيحيين بيقولوا علي الطلاق
ومسيحيين بيحسبنوا

دا ملوش غير معنى واحد
ان الكلام طالع من بقنا مافيش فرق بينه وبين الامثال الشعبية
ما فيهوش اي روح دينيه
يعني الجمل دي ما بقاتش اسلاميه دي بقت مصرية

مذيع مسلم

مش كل واحد بيقدم برامج دينية يتقال عليه مذيع مسلم
مش قصدي انه مش مسلم او انه مش مذيع
لا انا بص بأصد ان اللي يستخدم كل ادوات مهنته لخدمة الاسلام
هو ده اللى يتستحق اضافة مسلم بجوار مهنته
واحد زكي يقولي طب هو يعني انت بينطبق عليك الشرط
اقوله انا بتمنى ودا اسلوب بلاغي باعتبار ما سيكون ان شاء الله
اللي انا شايف انه يستحق لقب مذيع مسلم هو الاستاذ عمرو خالد
انا بشعر في كل برنامج بيعمله وكل فكرة بيطرحها انه فعلا بيحاول يخدم الاسلام
مش مجرد انه بيحاول يوصل معلومة او يعمل فرقعة او يجمع اكبر قدر من الاعلانات
مع احترامي لكل معارضيه او الناس اللي انتقدوه انا بتكلم على قالب مش على محتوى


تحيه الى عمرو خالد

الفن رساله

اتخنقت من الافلام العربي
كل الافلام حاجه واحد قصة حب شاذه
وبلاش كل الافلام لاني مش متابع جيد للسنما المصرية
عشان اتخنقت زي ما قلت في الاول

تشوف اي فلم تلاقي قصة حب فيها حاجة غلط وطول الفلم عمال يخترع في مشاكل وشوية بنات تتمايص وشويه هدوم او كانت هدوم قبل ما ينزل عليها التخفيض ونكت قديمة او تلميحات جنسيه قال يعنى على المنتغطى ونجمنا الكبير يضرب الرجاله على قفاها والحريم على مؤخراتها وما يخلاش الامر من شيخ لزوم التريقة والضحك

رغم ان عمري ما شفت فيلم اجنبي يطلع فيه رجل دين بصورة غير لائقة
احنا الشعب الوحيد اللي بيتريق على رجال الدين

وطبعا لازم شويت نصائح في اخر الفيلم لا تتعدى الدقيقة عشان يكون الفيلم هادف

ولما تسمع حد من الفنانين يطلع في التليفزيون يقولك الفن رسالة ما يبقاش كداب
ماهي الدقيقة بنص جنيه والرسالة كمان بنص جنيه
يعني الدقيقة = رسالة

اظاهر عندي اكتئاب ولا ايه مش عارف

في ناس كتير ملهاش علاقة بالهندسه بس عايشه الدور ومقنعا نفسها انهم مهندسينوالناس كمان بتساعدهم على كدهكل من ليس له علاقة بالشرطة او النيابه فهو مهندس - طبعا دول البشوات-
على فكرة انا خريج كليه الهندسة قسم نظم وحاسبات وشغال مبرمج كسيب ما شاء الله ونفسي في مرة احس بطعم كلمة مهندس
سعات كتيير بندم اني دخلت القسم ده واقول لنفسي ليه مدخلتش عمارة مانا بحب الرسم زي عنيا وكنت جايب امتياز وصفيه ورسم هندسي
دا انا حتا والدي كان مهندس معماري

وارجع اقول ماهو البرمجة برضه فن وهندسة وكانت كابسه على دماغي قوي وانا بختار
كنت حاسس ان دي المتعة الوحيده في الدنيا
افتكر قد ايه ببقى سعييد لما احل مشكله فضلت محيراني وقت طويل
غيرش بس بتوع حاسبات ومعلومات والمنح المجانيه هما اللى مضيعين علينا المتعة

الله يرحم والدي مكانش عايزني ادخل هندسه اصلا
قالي يابني الكمسري بيتقاله يا بشمهندس

اللهم ارحم أمواتنا وأموات المسلمين

hello world

اي واحد شغال في البرمجه يعرف
hello world
دائما اي كتاب بيبقى اول مثال فيه هو ده
انا ما حبتش ابدا البلوج بتاعي باكتئاب فقلت ابدأ بيها