اضراب

وانا نازل الشغل انهارده كنت ممنى نفسي بالاستمتاع بالمواصلات
ولكن لا تأتي الرياح بما تشتهي السفن

قلت في نفسي هي الناس اضربت عن الاضراب ولا قرروا يشتغلوا بزمه بعد العلاوة الرهيبه اللي هزت ميزانيه البلد

عموما انا ما كنتش مقتنع من الاول بفكرة الاضراب قصدي الاضراب في مصر مش الاضراب عموما خصوصا لو كان الاضراب لمده يوم واحد وبعد اسبوع اجازات

يمكن تكون فكرتي عن الاضراب مختلفه عن الناس اللى كانت بتدعوا ليه عشان كده احب اوضح فكرتي ولو حد شايفها غلط يصححلي

اللي بيعمل اضراب ده راجل مطحون ومظلوم طبعا بعد ما عمل اللى عليه على اكمل وجه وما عدش في ايده حيله غير انه يدفع الناس دفعا الى الوقوف في صفه فـبيلجا الى الضراب عشان يلفت انظار ناس ممكن ما يكونش ليها في المشكله الاصليه بس بالتاكيد هيكون ليها مصلحه انها تساعده

يعني اللي بيضرب عن الطعام عارف ان في ناس هتتصيت على حس مساعدته عشان كده بيجوع وهو في بطنه بطيخه صيفي
اللي بيضرب عن العمل عارف ان في ناس مصالحها هتتعطل واكيد هتقف جنبه عشان حل مشاكله هيفيد مصالحها

تفتكروا عطلة الموظفيين المصريين هيأثر على مين خصوصا ان انت بتتكلم في يوم واحد
في كل الاحوال مصالح الناس متعطله باضراب او من غيره
الحاجه اللي محتاجه ساعه بتستنى شهور
الناس نفسها مش مستعجله
"يا عم قول يا باسط اللى ميخلص انهارده يخلص بكره"
دي من الاقوال المأثورة عند المصريين

الوضع في المحله كان مختلف
انت بتتكلم في مصنع ومكن داير بياكل ويشرب يعني بيصرف
وكمان العمال قعدوا مضربين قد ايه

في المانيا عمال السكه الحديد عملوا اضراب
بس خلي بالك هما ما توقفوش عن العمل نهائيا لا
بدل ما يقف في المحطة دقيقه وقف عشر دقائق
طبعا كانوا مبلغين تفاصيل الاضراب لان تراكم التأخيرات ممكن يسبب كوارث
يعني في شغل زياده حصل علشان تنظيم حركة القطارات لتتناسب مع المواعيد الجديده

يدخل القطار المحطة ينزل السائق والمحصلين يقفوا على الرصيف يرفعوا لافتات فيها مطالبهم لمدة عشر دقائق ويرجعوا يركبوا تاني

في المحطات الكبيره المده بتزيد شويه وشغل السائق والمحصلين بيزيد كمان
بيلفوا بزجاجات مياه على كبار السن

لاحظ ان حركة القطارات لم تتوقف تماما انما اصابها بعض الخلل في المواعيد
لكن النتائج كانت مذهلة ذلك ان تأثير هذا الخلل كان كبيرا
وبالتالي كان صدى الاضراب كبير ومدوي

فهل اضراب يوم عن العمل في مصر يكون له اي دوي؟
او فلنقل ماذا علينا ان نفعل كي يكون الاضراب له صوت؟