الحلم ومعاده

حتى الاحلام بمعاد؟
ايوه طبعا امال انت كنت فاكر ايه
تحلم كده بمزاجك
كام مرة حلمت او اتمنيت حاجه بسيطة جدا وبعد ما حققتها حسيت انك كنت اهبل
او انك اندحك عليك في حلمك
طبعا كل ده غلط
انت لا كنت اهبل ولا اندحك عليك ولا حاجه كل الحكايه انك على ما حققت الحلم كان خلاص
ما بقاش وقته
ودي اكبر مشكله بين الاباء والابناء
الاباء بيحلموا لولادهم من يوم ما يتولدوا ويبدأوا يجهزوا ويستعدوا للحلم ده
وتكون النتيجة ان الولد يتمرد والاب يزعل
ونسمع المقولة الشهيرة
قلبي على ولدي انفطر وقلب ولدي على حجر
والاب بينسى ان حلمه اللي ابنه مش عايز يحققهوله ده هو كان بيحلم بيه من 20 سنه
طب هو ينفع دلوقت ولا لأ ياترى هو فكر في كده

برضه انت لما يبقا نفسك في عربيه تفرق
لما تجيب العربية وانت عندك 20 سنه
غير لما تجيبها وانت عندك 30 غير 40 وهكذا

مش بقول ما تحلمش لا بالعكس احلم واحلم واحلم
بس كل ما يمر بيك الزمن حدث حلمك وطوره